ISSN: 1689-6688
piątek, 26 czerwca 2009
ISSN: 1689-6688
piątek, 26 czerwca 2009
Europyjski Dziyń Somsiada już za nami. 6. czyrwca pogoda niyźle nos nastraszyła. W tym dniu rano jeszcze żech siedziała na szkolyniu, na kierym miałach sie uczyć ślonski godki i co chwila zaglądałach w okno i zastanawiałach sie czy bydzie loć czy niy bydzie. Tak po prowdzie to z tego szkolynia nic niy wiym, bo cały czos myślami byłach na swoim placu na Nikiszu.
Na szczyńscie poloło ino przez chwila a potym to już ino straszyło. Cało impreza zaczynała sie o dwanosty, bez toż niy szukejcie mie na zdjyńciach, bo jo sie jeszcze grzecznie uczyłach, ale potym to już byłach i nawet dzieliłach kawom i herbatom a potym wusztym.
Z cały ty imprezy nojwiyncy uciechy miały bajtle. Te nojmodsze miały konkurs na robiynie babek z piosku. A te starsze mogły sie zagrać w warcaby, w ping – ponga. Mieli tyż konkurs na to wto nojwiyncy bydzie kryncił hula – hop i jeszcze wto nojduży poskoko na skokance. Nojbardzi to sie cieszyli jak kożdy dostoł w rynka dyplom i jakoś drobno nagroda.
Do starszych tyż niy brakło rozrywek. Mogli my se pograć w warcaby. A przede wszystkim siednąć na ławce i poklachać z sobom jak za downych, dobrych lot. W tym dniu kożdy mog sie napić kawy czy herbaty i zjeść kawałek kołocza. Potym był konkurs na nojlepsze ciasto. Ciasta ocyniało niyzależne jury, żodyn z nich niy był z tego bloku a nawet niy z Nikisza.
Tym sposobym bezapelacyjnie wygrało ciasto naszy pani Helgi. Potym był wielki tort z napisym Europyjskie Świynto Somsiada, kożdy skosztowoł po kawałku. A o czworty zaczyło sie Wielkie Grillowanie. Był wuszt no i oczywiście tradycyjne krupnioki. A jak wto chcioł to mog sie jeszcze napić grochowki. Wszystkiymu towarzyszyła muzyka zespołu akordeonistów (niy pisza po śląsku, bo tego byście niy wiedzieli). Tego co te nasze bajtle przeżywały lotając po placu niy do opisać żodnymi słowami. To trza było widzieć.
Oficjalnie impreza skończyła sie o siódmy wieczór. Ale to jeszcze niy był koniec... Oj dzioło sie, dzioło... towarzystwo tak sie rozbawiło, że jeszcze do drugi w nocy na placu grała muzyka i wszyscy tańcowali. Niy było żodnych ekscesów, a co poniyktórzy jeszcze sie pytajom, kiedy bydzie nastympny roz. Jeszcze jedna dobro strona tego świynta jest tako, że teraz jak sie mijomy na drodze to niy godomy sie ino tradycyjnego „dziyń dobry” ino kożdy stanie i zamiyni z drugim pora słów.
Taki niyoficjalny dziyń somsoada to na pewno powtórzymy jak bydzie fajno pogoda.
A na oficjalny to trza poczkać aż cały rok. Wiym, że już szykujom sie ci z innych placów, bo im sie żol zrobiło, że u nos tak to fajnie wyszło.
