Pů našymu, eli po ślůnsku > U nos na Nikiszu

Dziyń somsiada

Teroz to jo za bardzo ni mom czasu, bo prawie cołki dziyń siedza przy kompie zawalono robotom i niy bardzo widza co sie wele mie dzieje. Ale że tak cały czos niy idzie siedzieć i rachować to od czasu do czasu siedna se na altanie. Patrza na plac i na to co sie tam wyrobio? Wiycie, w piyrszy chwili to żech nawet chciała tych karlusow przezywać. Bo tu… radio na fol… a łoni stojom na tym placu, coś tam godajom. A miny to majom takie, że zaroz mi to podpadło. Nic ino bydom cosik paskudzić. Nic ino kombinujom. Patrza dali a łoni bierom pyndzle w rynce, wywijajom nimi i malujom wszystko co im podyńdzie. Bo my momy na placu huśtowki, karasol, ławki a nawet grill. Richtig taki jak tyn z ty reklamy co to we Wielkanoc Mikołoj nim wleciał. Zaś te mniejsze bajtle to kopali w ziymi i sadzili kwiotki. Wiycie, jo miyszkom na Nikiszu i to w tym bloku kiery zdobył piyrsze miejsce w konkursie na nojpiykniyjszy plac. Ino jo wom powiym tak, konkurs konkursym a u nos na placu zawsze było piyknie. Na ty naszy altanie tyż zawsze jest pełno blumow. Jo wom tak godom o kwiotkach, o tym placy ale niy godom po co to wszystko? „Co by piyknie było kole nos”, ja tyż ale jest taki „Europyjski Dziyń Somsiada” i łon tyż bydzie 6 czyrwca u nos na placu. Na tym nojfajniyjszym placu na Nikiszu. To mo być takie spotkanie co by sie ludzie bliży poznali, poklachali. Jo tyż myśla, że ci co sie wadzom to może by sie w taki dziyń pogodzili.

Majom tyż być różne konkursy dlo bajtli i do tych trocha starszych bajtli czyli do nos. W planach momy konkurs na nojlepsze ciasto czy jakoś śląsko zupa. Mo tyż być „Festiwal Jodła Ślunskiego” wtoś pedzioł, że mo tyż być konkurs na nojlepszy żur. Jo tak niy wiym, tyn istny chyba niy wiedzioł co godo. Bo najlepszy żur to robi Helga z naszego bloku.

Jo sie wczoraj pooglądałach tako oficjalno zajta tego dnia. Tam były takie relacje z Niemiec, z Włoch, Francji i Szwecji. Tam to jest naprowdy tako impreza na całe miasto a niy ino na jednym placu. Tam to nawet zisty piekom z takim napisym „Europyjski Dziyń Somsiada”.

Tak naprowda to jo sama jeszcze niy wiym jak to bydzie u nos wyglądało. Na pewno bydom klachy przy grillu. Jak nom sie udo to jo z moim bratym tyż coś szykujymy. Ale na razie to wom niy powym co to bydzie. Ino tak trocha się boja o kiery co poniektórzy skończom świyntować? A jak chcecie wiedzieć jak to wszystko bydzie wyglądało to przyjedźcie

6 czyrwca 2009 roku na Nikisz. Możecie tyż sie takie świynto zrobić u siebie. Bo tak naprowada cało idea tego świynta opiyro sie na jednym zdaniu: Zaproś somsiada na kawa.

Ewelina Soska
Najpopularniejsze Pů našymu, eli po ślůnskuOdpust u Świynty Anny na NikiszuII Festiwal Sztuki Naiwnej Nikisz – ForBalkanRafał Rękosiewicz po ślůnskuPora słow po Europyjskim Dniu Somsiada
Najwyżej oceniane Pů našymu, eli po ślůnskuII Festiwal Sztuki Naiwnej Nikisz – ForBalkanNowo akcjo na Nikiszu – „Myjymy Komzony”Pożar w Bytomiu na ulicy SkładowejPora słow po Europyjskim Dniu Somsiada
PrzewodnikiAlbaniaNepalPolskaRumunia
Najpopularniejsze zdjęcie w dzialeII Nikisz - ForNajwyżej oceniane:Komzony
Oceń zamieszczony obok artykuł.
Minister kazał, więc uprzejmie informujemy, że nasze strony wykorzystują pliki cookies (ciasteczka) i inne dziwne technologie m.in. w celach statystycznych. Jeśli Ci to przeszkadza, możesz je zablokować, zmieniając ustawienia swojej przeglądarki. Więcej informacji znajdziesz w artykule: Pliki cookies (ciasteczka) i podobne technologie.