No to jedna impreza, czyli Dziyń Somsiada momy już za sobom. A teroz już 26 czyrwca zaczyła sie drugo impreza czyli II Festiwal Sztuki Naiwnej Nikisz – For. W piątek o godzinie 10:00 rozpocznie sie plyner malarski „Grupy Janowskiej”, przy ty pogodzie ciynżko mi jest powiedzieć jak dugo bydzie trwoł. Teroz żech sie dowiedziała, że podczas tego plyneru moj brat bydzie groł na mandolinie i na organkach co by im trocha umilić te malowanie.

A jo tego artykułu chyba dzisiej niy skończa, bo zaś przed chwilom żech sie dowiedziała, że tyn jutrzejszy plyner to jest bojkotowanie przez obecno Grupa Janowsko całego festiwalu. Nasi malyrze bojkotujom festiwal, bo podobno niy zamieścili informacji o nich w katalogu i jeszcze wyszła jakoś sprawa z wystawianiym ich obrozkow. Obrozy Grupy Janowski pódzie oglądać na Giszowcu w „Gawlikówce”, kiero mieści sie w Parku pod Lipami.

Jo chca zostać neutralno bez toż niy byda sie na tym tymat wypowiadać.

W kożdym razie 26 czyrwca 2009 o 18:30 bydzie miało miejsce oficjalne otwarcie II Festiwalu Sztuki Naiwnej Nikisz – For.

Tradycyjne musza wom trocha napisać o samy idei festiwalu i co to takiego jest.

Idea stworzynia Światowego Festiwalu Sztuki Naiwnej powstała w siyrpniu 2003 roku w Verneuil-sur-Avre, mały mieścinie w Górnej Normandii. Inicjatorym pomysłu było polsko – francuskie małżyństwo Jacques Dubois i Martha Kołodziej – malarka sztuki naiwnej.

Piyrszy francuski festiwal odbył sie w Świynta Wielkanocne 2005 roku. Na piyrszym wystawiło sie 36 malyrzy i rzeźbiorzy z 6 krajów, wystawiono 370 dzieł, a wystawa odwiedziło niycałe 4.000 osób. Takie były poczontki ale z kożdym rokiym przybywało tych co wystawioli i tych co zwiedzali ta wystawa. W pora lot festiwal stoł sie wydarzyniym o światowy randze a tym samym rozsławił zabytkowe miasto Verneuil. Tyla o Francji. I tak rok tymu wtoś a konkretnie francuskie stowarzyszenie F.I.V.A.N wroz z Fundacjom EKO- ART Silesia wpadli na pomysł co by tako wystawa zorganizować w Polsce a konkretnie na Nikiszu, kiery mo szansa kiedyś stać sie takim samym artystycznym miasteczkiym jak Verneuil. Nazwa wystawy zbudowano została na grze słów NIKISZ – od lokalny nazwy Nikiszowca i FOR – co oznaczo dla. Jak wtoś sie bawi w rozrywki umysłowe to wiy, że ta nazwa jest tyż specjalnym odwołaniym do skojarzynio z naszym nojbardzi znanym twórcom prymitywistom czyli Nikiforem¹.

W zeszłym roku prezyntowane były obrozy artystów z Serbii, Rumunii, Włoch, Francji, Belgii, Wielki Brytani, Hiszpani, Szwecji, Finlandii, Ukrainy, Chorwacji, Rosji, Polski, Brazylii, Satnów Zjednoczonych, Argentyny, Meksyku, Nikaragui, Senegalu, Maroka i w końcu Nowej Gwinei. Jak już teraz widać, to co w zeszłym roku było ino eksperymyntym na stałe już wpisało sie w kulturalny kalyndorz Nikisza. Na wystawie prezyntować sie bydzei 130 artystów z całego świata i z polski. Przez cały czos bydzie tyż kupa imprez towarzyszących. Na koniec podom wom szczegółowy program².

A teraz napisza, co bydzie sie dzioło 26 lipca, bo to bydzie dziyń odpustu na Nikiszu. Nazwa imprezy to „Odpust u Świynty Anny” jako, że patronkom naszy parafii jest świynto Anna. Kiedyś na Nikiszu, odpusty były wielkie. Jak zaczynały sie na Nikiszu, to kończyły aż na Jonowie³. Od samego kościoła na przestrzyni blisko 2 kilometrów ciągnyły sie szytandy z makaronami, piernikami, imbirym i różnymi innymi maszketami. Na naszym odpuście szło tyż kupić kiszone ogorki prosto z beczki. Były sztandy ze świyntymi obrozkami. Obowiązkowo takie z pierdołkami do dzieci, zwłaszcza z ulubionymi przez nos diobełkami co pokazywały czerwone jynzyki. Jak odpust to wtoś musioł sprzedawać korki i plaspatrony co by szło potym strzylać. Były tam baloniki i wata na patyku. A na końcu karasole. Takie huśtowki w kształcie łódek. Właziło sie do tego, chyba w sześć osób i trza sie było samymu huśtać. Roz nasz kolega tak sie rozhuśtoł, że wpod do ogrodka z różami. On był cały podropany po gymbie, a ta babka go jeszcze sprzezywała, bo i kwiotki połomoł. Był taki karasol na kiery my godali „dzikie auta”. I jeszcze jedyn co był nojważniyjszy – kieciok. A przy samym płocie stoły strzelnice, kaj szło ustrzelić lizoka abo kwiotek z piór. Wszyscy wiymy, że takich odpustów już nikaj ni ma.

U nos do ty pory odpust wyglądoł tak jak wszyndzie, pora karasoli takich ino do dzieci, jakieś sztandy z piernikami i plastikowymi zabawkami.

No to my, miyszkańcy Nikisza razym z PCAL Nikiszowiec, Stowaryszeniem „Razem dla Nikiszowca” i organizatorami „Nikisz-For” wymyślili, że tym razym tyn odpust bydzie wyglądać inaczy niż do ty pory i inaczy niż wszyndzie.

Odpust to bydzie wielko impreza kulturalno. Zawsze w odpust nojważniyjszo jest msza o 11:00 w trakcie kiery bydzie procesjo i przyjdom nasze baby w strojach ludowych i chopy w galowych górniczych mundurach. W kościele planowano jest wystawa sztuki sakralny.

Na placu kościelnym wystawiać sie bydzie Stowarzyszenie „Razem dla Nikiszowca”, kiere bydzie wystawiać i sprzedawać rynkodzieło przygotowane przez miyszkańców Nikisza i książki o naszy dzielnicy. Bydzie tyż szło kupić wydawnictwa o tymatyce religijny wystawione przez Ksiyngarnia Świyntego Jacka.

Centrum Aktywności Lokalnej na Nikiszu przygotowało prezyntacja Izby Śląski, kaj nasza koleżanka, miyszkanka Nikisza bydzie warzyć tradycyjny śląski obiod czyli kluski, modro kapusta i rolada. Bydzie tyż wspólne rozporowianie, jedzynie i zabawy. Przy kawie i kołocu pódzie spotkać pora ciekawych ludzi i pogodać sie z nimi. Dlo dzieci przygotowane jest malowanie Balkana, dmuchany zamek i inne atrakcje. Wszystkiymu bydom towarzyszyć wystympy artystyczne kiere poprowadzom znane osobistości.

Ale jak Nikisz-For to przeca niy może braknoć artystów. No toż cały Nikiszowiecki rynek bydzie opanowany przez różne śląskie grupy malarskie i bydzie sie tam odbywoł jednyn wielki plyner artystyczny. Bydom tam wystawiane prace współczesnych polskich jak i śląskich artystów niyprofesjonalnych i ich gości. Bydom prezyntowane techniki malowanio. I pódzie sie przyjrzeć jak nasi artyści malujom. A jak wtoś bydzie mioł ochota to bydzie móg se tyż coś kupić z obrazów, rzeźb, rynkodzieła.